John 9

UJesu Usilisa Indoda Eyazalwa Iyisiphofu

1UJesu wathi elokhu ehamba wabona indoda eyayiyisiphofu kwasekuzalweni kwayo.

2Abafundi bakhe bambuza bathi, “Rabi, ngubani owenza isono, indoda le noma abazali bayo ukuze izalwe iyisiphofu na?”

3UJesu wathi, “Kakusikho ukuthi abazali bayo loba yona indoda le yenza isono, kodwa lokhu kwenzakala ukuze umsebenzi kaNkulunkulu ubonakaliswe empilweni yayo. 4Nxa kulokhu kusemini simele siwenze umsebenzi wakhe ongithumileyo. Ubusuku buyeza lapho kungelamuntu ongasebenza khona. 5Nxa ngisekhona emhlabeni, ngiyikukhanya komhlaba.”

6Esetshilo lokhu wakhafulela emhlabathini, wavuba udaka ngamathe waluname-ka emehlweni endoda. 7Wayitshela wathi, “Hamba uyogeza esizibeni saseSilowami: (Igama leli litsho ukuthi ‘uThunyiwe’). Ngakho indoda yahamba yayageza, yabuyela ekhaya isibona.

8Omakhelwane bayo lalabo abahlezi beyibona icela babuza bathi, “Kakusiyo yini indoda le eyayihlala icela?” 9Abanye baqinisa ukuthi kwakuyiyo. Abanye bathi, “Hatshi, lo ufana layo nje kuphela.” Kodwa yona yagcizelela yathi, “Ngiyiyo leyondoda.”

10Bamcindezela bathi, “Pho amehlo akho avuleke kanjani?”

11Waphendula wathi, “Indoda abayithi nguJesu ivube udaka yalunameka emehlweni ami. Ingitshele yathi kangiye eSilowami ngiyogeza. Ngakho ngiyile ngayageza, ngasengibona.”

12Bayibuza bathi, “Ingaphi leyondoda?” wathi, “Kangazi.”

AbaFarisi Badingisisa Ngalokho Kusiliswa

13Indoda leyo eyayikade iyisiphofu yalethwa kubaFarisi. 14Usuku uJesu enza ngalo udaka wavula amehlo endoda leyo lwaluyiSabatha.

15AbaFarisi baphinde bayibuzisisa ukuthi kwenziwani ukuze ibone. Indoda yaphendula yathi, “Uninde udaka emehlweni ami, ngageza, manje sengibona.”

16Abanye abaFarisi bathi, “Umuntu lo kaveli kuNkulunkulu ngokuba kaligcini iSabatha.” Kodwa abanye babuza bathi, “Isoni singayenza kanjani imimangaliso enje na?” Kanjalo badabukana.

17Bacina sebephendukela njalo endodeni eyayiyisiphofu bathi, “Wena uthini ngaye? Ngamehlo akho awavulileyo.” Indoda yaphendula yathi, “Ungumphrofethi.”

18AbaJuda kabazange bakholwe ukuthi indoda le yayikade iyisiphofu lokuthi yayisiyenziwe yabona kwaze kwabizwa abazali bayo. 19Bababuza bathi, “Lo yindodana yenu yini? Nguye lo elithi wazalwa eyisiphofu? Sekwenzeke kanjani ukuthi khathesi usebona?”

20Abazali baphendula bathi, “Thina sazi ukuthi uyindodana yethu, njalo siyakwazi ukuthi wazalwa eyisiphofu. 21Kodwa ukuthi khathesi usebona lokuthi amehlo akhe avulwe ngubani, kasikwazi. Mbuzeni. Usekhulile; uzazikhulumela.”

22Abazali bakhe bakutsho lokhu ngokuba babesesaba abaJuda, ngokuba abaJuda base bevele baquma ukuthi loba ngubani owayezakuthi uJesu wayenguKhristu wayezakwesulwa esinagogeni. 23Yikho abazali bakhe bathi, “Usekhulile; mbuzeni yena.”

24Indoda eyayiyisiphofu baphinde bayibiza okwesibili bathi, “Nika udumo kuNkulunkulu. Siyakwazi ukuthi umuntu lo uyisoni.”

25Yaphendula yathi, “Ukuthi uyisoni kumbe hatshi kangikwazi. Mina kunye engikwaziyo. Ngangiyisiphofu kodwa manje sengibona!”

26Basebeyibuza bathi, “Wenzeni kuwe na? Uwavule njani amehlo akho?”

27Yaphendula yathi, “Sengilitshelile kodwa kalifunanga ukuzwa. Lifunelani ukukuzwa njalo? Lani lifuna ukuba ngabafundi bakhe na?”

28Khonapho basebemthuka besithi, “Ungumfundi walumuntu! Thina singabafundi bakaMosi! 29Siyakwazi ukuthi uNkulunkulu wakhuluma kuMosi, kodwa lo umfokazi, kasimazi lokuthi uvela ngaphi.”

30Indoda yaphendula yathi, “Manje lokhu kuyamangalisa! Kalimazi lapho avela khona, kodwa uwavulile amehlo ami. 31Siyakwazi ukuthi uNkulunkulu kazilaleli izoni. Ulalela umuntu olobunkulunkulu owenza intando yakhe. 32Kakho osewake wezwa ngokuvulwa kwamehlo omuntu owazalwa eyisiphofu. 33Aluba umuntu lo ubengaveli kuNkulunkulu ubengasoze enze lutho.”

34Baphendula lokhu ngokuthi, “Wazalwa ucwile nya esonweni; singafundiswa nguwe thina!” Base bemxotshela phandle.

35UJesu wakuzwa ukuthi babemxotshele phandle, wathi esembonile wathi kuye, “Uyakholwa eNdodaneni yoMuntu na?”

36Indoda yabuza yathi, “Ingubani na, mnumzana? Ngitshela ukuze ngikholwe kuyo.”

37UJesu wathi, “Khathesi usuyibonile; iqiniso yikuthi inguye lo okhuluma lawe.”

38Indoda yase isithi, “Nkosi, ngiyakholwa,” yase imkhonza.

39UJesu wathi, “Ngeza lapha emhlabeni ukuzakwahlulela, ukuze iziphofu zibone kuthi labo ababonayo babonakale beyiziphofu.”

40Abanye abaFarisi ababelaye bamuzwa uJesu esitsho lokhu babuza bathi, “Ukuthini? Lathi siyiziphofu yini?”

41UJesu waphendula wathi, “Aluba beliyiziphofu ngabe kalilamlandu. Kodwa umlandu wenu umi ngokuba lizitshaya abakwaziyo abakwenzayo.